කැළණිය ප්‍රදේශයේ ප්‍රමුඛතම ව්‍යායාම මධ්‍යස්ථාන දෙකක් වන Muscle Max Fitness Kingdom සහ Iron Arms එක් වී MUSCLE MAX SRI LANKA TOP 10 2024 කායවර්ධන තරගය බලගැන්වීමට සූදානමින් සිටින අතර, එයට ශ්‍රී ලංකා කායවර්ධන සම්මේලනයේ පූර්ණ සහය හිමි වී තිබේ. දිවයින පුරා වෙසෙන විශිෂ්ට කායවර්ධන ක්‍රීඩකයන් රාශියක් මෙම තරගාවලියට සහභාගී වනු ඇත.
Excel World හි Maco Polo ශාලාවේදී 2024 මාර්තු 12 දින පැවති මාධ්‍ය හමුවකදී මෙම තරගය පිළිබඳ තොරතුරු මාධ්‍ය වෙත අනාවරණය කරන ලදි. මෙම තරගය ඉදිරි මාස කිහිපය පුරා පැවැත්වෙනු ඇති අතර, අවසන් මහා තරගය 2024 මැයි 26 වන දින කැලණිය ගෝනවල Clover Banquet Hall හිදී පැවැත්වීමට නියමිත ය. විවිධ කාණ්ඩ යටතේ පැවැත්වෙන තරග මාලාවකින් අනතුරුව ජයග්‍රාහකයන්ට පදක්කම් හා කුසලාන පිරිනමනු ඇත.
තරගයේ ප්‍රධානතම කුසලානය වන MR MUSCLE MAX පිරිනැමීම දීප ව්‍යාප්ත විවෘත ඉසව්වකින් අනතුරුව සිදුකිරීමට නියමිත ය. ශ්‍රී ලංකාවේ නන් දෙසින් තරගයට සහභාගී වන තරගකරුවන් අතරින් විශිෂ්ටතම තරගකරුවන් 10 දෙනා මෙම කුසලානය සඳහා තරග වදිනු ඇත. ප්‍රධාන ජයග්‍රාහකයාට අමතරව ‘Muscle Max – Physique’ කාණ්ඩය යටතේද ජයග්‍රාහකයෙකු තෝරාගැනේ. එමෙන්ම MR. KELANIYA 2024 ප්‍රධාන කාණ්ඩය යටතේ MR. KELANIYA Top 10 Bodybuilders, MR. KELANIYA – Physique, MR. KELANIYA – Handsome සහ MISS. KELANIYA – Athletic යන අනුකාණ්ඩවල පළමු, දෙවැනි සහ තුන්වැනි ස්ථාන සඳහා ජයග්‍රාහකයන් තෝරාගැනෙනු ඇත.
“නිරෝගී හා තෘප්තිමත් ජීවන රටාවන් ප්‍රවර්ධනය කරන මෙවැනි තරගාවලියක් පැවැත්වීමට හැකි වීම අපට මහත් සතුටක්. සෞඛ්‍යයට හානිකර පුරුදු අත්හැර සෞඛ්‍ය සම්පන්න පුරුදු වෙත යොමුවන සමාජයක් බිහිකිරීම අපගේ බලාපොරොත්තුවයි. ඒ වෙනුවෙන් අප සමග එක්වන මෙන්, කායවර්ධන ක්‍රීඩාවේ නියුතු තරුණයන්ට අප ආරාධනා කරනවා. MUSCLE MAX SRI LANKA TOP 10 2024 යනු ඔවුන්ට තම දක්ෂතා ප්‍රදර්ශනය කිරීමට ලැබෙන අගනා අවස්ථාවක්. විනය සහ පෞද්ගලික විශිෂ්ටත්වය හඹා යාම ඉලක්ක කරගත් මේ සුවිශේෂී ක්‍රීඩාවේ කිරුළු පළඳින්නට රට පුරා ක්‍රීඩකයන් අප වටා රොදබඳිනු ඇතැයි අප බලාපොරොත්තු වනවා.” MUSCLE MAX SRI LANKA TOP 10 2024 ව්‍යාපෘති සභාපති චානක පීටර් මහතා පැවසී ය.
“MUSCLE MAX SRI LANKA TOP 10 2024 තරගාවලිය, මෙම ක්‍රීඩාවේ විනිවිදභාවය හා සාධාරණත්වය සම්බන්ධයෙන් පෙරළිකාරී තරගාවලියක් වනු ඇතැයි යන්න අපගේ විශ්වාසයයි. ආරම්භයේ සිට අවසානය දක්වාම මේ විනිවිදභාවය හා සාධාරණත්වය පවත්වා ගැනීමට අප බලාපොරොත්තු වනවා. තරගාවලියට අදාළ මාර්ගෝපදේශ අකුරට පිළිපදිමින්, සියලුම ක්‍රීඩකයන්ට සාධාරණ හා සමාන අවස්ථා ලබාදීම අපගේ අරමුණයි. එමෙන්ම තම හැකියාවන් වැඩිදියුණු කරගනිමින්, තරගාවලියේ තමන්ට අදාළ කාණ්ඩ තුළ සහ අවසන් මහා තරගය තුළ ජයග්‍රහණ හිමිකරගැනීම සඳහා තරගකරුවන්ට පූර්ණ සහයක් හා මගපෙන්වීමක් ලබාදීමටත් අප සූදානම්. කායවර්ධන ක්‍රීඩාවේ සාධාරණත්වය හා විනිවිදභාවය ප්‍රවර්ධනය කරන අතරම සෞඛ්‍ය සම්පන්න ජීවන රටාවක වැදගත්කම අවධාරණය කරන මේ තරගාවලිය සමග අත්වැල් බැඳගන්නා මෙන් මා සියලුම දෙනාට ආරාධනා කරනවා.” තරගාවලි අධ්‍යක්ෂ ජොනී මහතා පැවසී ය.
“කායවර්ධනය ඇතුළුව තාරුණ්‍ය වැඩි වශයෙන් ශාරීරික ශක්තිය සහ සුවතාවය කෙරෙහි අවධානය යොමුකරන අතරම ඔවුන්ගේ ශක්තිය කෙරෙහි විශ්වාසය තැබීමටත් සමාජයෙන් එල්ල වන අහිතකර බලපෑම් වලින් මිදීමටත් අප ඔවුන්ව දිරිමත් කළ යුතු වේ. ඊට අමතරව කායවර්ධන මධ්‍යස්ථානයේ දී සෞඛ්‍ය සහ ආරක්ෂාව පිළිබඳව ද දැනුවත් කළ යුතු අතරම ක්‍රීඩාව හුදෙක් ශරීර වර්ධනය කරගැනීමක් ම නොවන බවත් එය නිරෝගීකම වර්ධනය කරගැනීමක් වන අතරම නිෂේධාත්මක දේට ඔරොත්තු දීමේ හැකියාවන් ද වර්ධනය කිරීමකි. එම නිසා තාරුණ්‍යයේ ඉදිරි අනාගතය ගොඩනැගීමට MUSCLE MAX SRI LANKA TOP 10 2024 ගන්නා මේ උත්සාහය අගය කිරීමට මම මෙය අවස්ථාවක් කර ගනිමි.” යැයි ජාතික තරුණ සේවා සභාවේ පුහුණුව හා සංවර්ධනය පිළිබඳ අධ්‍යක්ෂ රසින්ත දෑලපොල සභාව අමතමින් පැවසීය.
ශ්‍රී ලංකාවේ සෞඛ්‍ය සම්පන්න සහ වගකීම්සහගත කායවර්ධන ක්‍රීඩා සම්ප්‍රදායක් බිහිකිරීම අරමුණු කරගත් MUSCLE MAX SRI LANKA TOP 10 2024 සමග අත්වැල් බැඳගැනීමට දැන් අනුග්‍රාහකයන්ට අවස්ථාව උදා වී ඇත. අනුග්‍රාහකත්ව අවස්ථා, අයදුම්පත් සහ ප්‍රවේශ පත්‍ර සඳහා 0772793893 අංකයෙන් Muscle Max Sri Lanka Top 10 2024 ව්‍යාපෘති සභාපති චානක පීටර් මහතා හෝ 0776677808 අංකයෙන් තරගාවලි අධ්‍යක්ෂ ජොනී මහතා අමතන්න.
