ලංකා විදුලි පුද්ගලික සමාගමේ (LECO) නිල රථයක් තම මැතිවරණ ප්‍රචාරක කටයුතුවලට යොදා ගත් බවට කරන චෝදනාව තරයේම ප්‍රතික්ෂේප කරන බව හිටපු මන්ත්‍රී නාමල් රාජපක්ෂ මහතා පවසනවා. අද (02) පෙරවරුවේ ශ්‍රී ලංකා පොදුජන පෙරමුණ නාමල් රාජපක්ෂ මහතාගේ මාධ්‍ය අංශයෙන් නිල නිවේදනයක් නිකුත් කරමිනුයි මේ බව සඳහන් කර ඇත්තේ. ලංකා විදුලි පුද්ගලික සමාගමේ සුබසාධන අංශයට අයත් රථයක් ජනාධිපතිවරණයේ ප්‍රචාරක කටයුතු සඳහා යොදාගත් බවට නගන චෝදනාව සම්පූර්ණයෙන්ම අසත්‍ය හා පදනම් විරහිත වූවක් බවට ද නාමල් රාජපක්ෂ මහතාගේ මාධ්‍ය අංශය පවසනවා. අනුරාධපුරයේ දී අගෝස්තු 21 දින පැවති මංගල ප්‍රචාරක රැලිය සඳහා නාමල් රාජපක්ෂ මහතාගේ මාධ්‍ය අංශය දැනුවත් ව ලංකා විදුලි පුද්ගලික සමාගමේ (LECO) රථයක් යොදාගෙන නොමැති බවටයි අදාළ නිවේදනයේ දැක්වෙන්නේ. අදාළ සිදුවීම සම්බන්ධයෙන් ලංකා විදුලි පුද්ගලික සමාගම (LECO) සිදුකළ මූලික අභ්‍යන්තර පරීක්ෂණයෙන් ද මෙම චෝදනාව දේශපාලනික එදිරිවාදිකම් අනුව යමින් සිදු කළ අසත්‍ය චෝදනාවක් බව හෙළි ව ඇතැයි වාර්තා වන බව ද එම නිවේදනයේ සඳහන් බවටයි නාමල් රාජපක්ෂ මාධ්‍ය ඒකකයේ මාධ්‍ය ලේකම් ෂෙරෝන් සමරනායකගේ අත්සනින් යුතුව නිකුත් කළ ලිපියෙහි දැක්වෙන්නේ. යම්කිසි ගැටලුකාරී තත්ත්වයක් ඇත්නම් ඕනෑම පරික්ෂණයක් සඳහා අවශ්‍ය පූර්ණ සහයෝගය ලබාදීමට නාමල් රාජපක්ෂ මහතා මෙන් ම ශ්‍රී ලංකා පොදුජන පෙරමුණ ද සූදානම් බව ද එහි වැඩිදුරටත් සඳහන්.
LECO රියක් හිටපු මන්ත්‍රී නාමල් රාජපක්ෂ මහතාගේ ඡන්ද ප්‍රචාරක කටයුතුවලට ?
Leave a comment
