DFCC බැංකුව ශ්‍රී ලංකා දමිළ කාන්තා සංගමයේ කාන්තා දින සැමරුමට අත්වැලක් වෙයි 

DFCC බැංකුවේ ප්‍රමුඛතම බැංකුකරණ අත්දැකීම වන ‘DFCC Pinnacle’ සහ කාන්තාවන් වෙනුවෙන්ම හඳුන්වා දී ඇති බැංකුකරණ විසඳුමක් වන ‘DFCC ආලෝකා’ එක් වී, ශ්‍රී ලංකා දමිළ කාන්තා සංගමයේ ජාත්‍යන්තර කාන්තා දින සැමරුමට අනුග්‍රහය දැක්වීමට පසුගියදා කටයුතු කළේ ය.  මෙම සැමරුම් උළෙලේදී කාන්තාවන් මෙතෙක් අත්කරගෙන ඇති ජයග්‍රහණ සමරන ලද අතර, සමාජය තුළ ස්ත්‍රීපුරුෂ සමානාත්මතාව හා අන්තර්කරණය තහවුරු කිරීමේ වැදගත්කමද අවධාරණය කරන ලදි. 

මේ සම්බන්ධයෙන් DFCC බැංකුවේ Pinnacle සේවා/ශාඛා බැංකුකරණ සැලසුම් සහ ක්‍රියාත්මක කිරීම් ප්‍රධානී ශේරා හසන් මහත්මිය “ශ්‍රී ලංකා දමිළ කාන්තා සංගමයේ කාන්තා දින සැමරුමට මෙන්ම මෙරට කාන්තාවන් සවිබල ගැන්වීමට ඔවුන් දරන උත්සාහයට අත්වැලක් වීමට හැකි වීම අපට මහත් සතුටක්. කාන්තාවන් වෙනුවෙන්ම හඳුන්වා දී ඇති ‘DFCC ආලෝකා’ වැනි විසඳුම් හරහා රටේ කාන්තාවන් සවිබල ගැන්වීමට DFCC බැංකුවද කැප වී සිටිනවා. සෑම කාන්තාවකටම දියුණුව ළඟා කරගැනීමට උපකාරී වන මෙවැනි ප්‍රයත්නයන්ට දායක වීමට හැකි වීම අප සලකන්නේ ගෞරවයක් ලෙසයි. ඉදිරියටත් මූල්‍ය අන්තර්කරණය ඔස්සේ ශ්‍රී ලංකාවේ කාන්තාවන් සවිබල ගැන්වීමේ මෙහෙවර අඛණ්ඩව ඉදිරියට ගෙනයාමට අප බලාපොරොත්තු වනවා.” මෙසේ පවසන ලදි.

මෙම කාන්තා දින සැමරුම් වැඩසටහනට සංවාද, වැඩමුළු සහ දේශන රැසක් ඇතුළත් වූ අතර, විවිධ ක්ෂේත්‍රවල කැපීපෙනෙන පුද්ගලයන් රාශියක් ඊට දායක වූහ. උත්සවයේ ප්‍රධාන දේශකයන් විසින් විශේෂයෙන්ම කාන්තාවන් සවිබල ගැන්වීමේදී අධ්‍යාපනය, මූල්‍ය ස්වාධීනත්වය සහ සමාජයීය බාධාවන් බිඳදැමීමේ වැදගත්කම පිළිබඳව අවධාරනය කරන ලදි. එමෙන්ම මෙම උත්සවය, කාන්තාවන්ට විවිධ ක්ෂේත්‍රවල කැපීපෙනෙන පුද්ගලයන්, පුරෝගාමීන් සහ සමාන ඉලක්ක හා අරමුණු සහිත කාන්තාවන් සමග සම්බන්ධ වීමට ලැබුණු අගනා අවස්ථාවක් විය. 

මෙම උත්සවයේ තවත් සුවිශේෂී අවස්ථාවක් වූයේ, DFCC බැංකුවේ #EmpowHer වැඩසටහන දියත් කිරීම ය. ශ්‍රී ලංකාවේ කාන්තාවන් අතර ව්‍යවසායකත්වය ප්‍රවර්ධනය කිරීම මෙම වැඩසටහනේ අරමුණ වී ඇති අතර, මේ යටතේ ප්‍රධාන වශයෙන් ‘DFCC ආලෝකා’ විසඳුම හරහා කාන්තාවන් සවිබල ගැන්වීමට පියවර ගැනෙනු ඇත. 

කාන්තාවන් අතර මූල්‍ය සාක්ෂරතාව හා අන්තර්කරණය ප්‍රවර්ධනය කරවීම සඳහා ‘DFCC ආලෝකා’ සුවිශාල මෙහෙවරක් ඉටුකරමින් සිටී. ජීවිතයේ විවිධ අවස්ථාවල පසුවන කාන්තාවන්ගේ අවශ්‍යතාවන්ට මැනැවින් ගැළපෙන පරිදි සැලසුම් කර ඇති ‘DFCC ආලෝකා’, මූල්‍ය ස්වාධීනත්වය හා සෞභාග්‍යය කරා යන ගමනේදී කාන්තාවන්ට බෙහෙවින් වැදගත් වන විසඳුමක් ලෙස හැඳින්විය හැකි වේ.