ආබාධ සහිත පුද්ගලයින් මෙරට ශ්‍රම බලකායට එක් කර ගැනීමේ සුවිසල් ඉදිරි පියවරක් තබමින් ශ්‍රී ලංකාවේ ඇඟලුම් කර්මාන්තයට ඔවුන් සම්බන්ධ කර ගැනීමේ වැඩසටහනක් දියත් කිරීමට පසුගියදා කටයුතු කළේය. Inclusive Threads ලෙස නම් කර ඇති එම වැඩසටහන විවිධ ආබාධ සහිත පුද්ගලයින් වෙත වටිනා රැකියා අවස්ථාවන් නිර්මාණය කිරීම සඳහා වන රාජ්‍ය හා පෞද්ගලික අංශය සතු හැකියාව මනාව ප්‍රදර්ශනය කරනු ලබයි. ඔස්ටේ්‍රලියාවේ විදේශ කටයුතු හා වෙළෙඳ දෙපාර්තමේන්තුවේ සහයෝගය යටතේ ජාත්‍යන්තර කම්කරු සංවිධානයේ හා ජාත්‍යන්තර මූල්‍ය සංස්ථාවේ හවුල්කාරීත්වය තුළින් Better Work Sri Lanka විසින් මෙම වැඩසටහන මෙහෙයවනු ලබයි. ඒ මඟින් වෘත්තීය පුහුණු මධ්‍යස්ථාන වැඩි දියුණු කිරීම, සේවා යෝජකයන් හා සේවකයින් ප්‍රායෝගික හැකියාවන්ගෙන් ශක්තිමත් කිරීම හා කර්මාන්තය පුරා රැකියා අවස්ථාවන් ප්‍රවර්ධනය කිරීමට අපේක්ෂා කරනු ලබයි.
මේ සම්බන්ධයෙන් අදහස් දැක්වූ ඒකාබද්ධ ඇඟලුම් සංගම් සංසදයේ (JAAF) මහ ලේකම් යොහාන් ලෝරන්ස් මහතා මෙම වැඩසටහන වෙනුවෙන් තම සංගමයේ දායකත්වය පිළිබඳ සඳහන් කර සිටියේ “ විවිධත්වය හා සමානාත්මතාව දියුණු ඇඟලුම් කර්මාන්තයක අත්‍යාවශ්‍ය සාධකයන් ලෙස පෙන්වා දිය හැකියි. එම කර්මාන්තය තුළ ඇති දුෂ්කරතාවයන් අවම කරමින් ආබාධ සහිත පුද්ගලයින්ගේ හැකියාවන් කර්මාන්තය වෙනුවෙන් යොදා ගැනීමේ අවස්ථාව Inclusive Threads වැඩසටහන සමඟ අපට ලැබී තිබෙනවා. ඒ සඳහා ආදර්ශවත් අයුරින් නායකත්වය ලබා දීමේ හැකියාව අප සතු වන අතර ඒ තුළින් හොඳම ආචාරධර්ම හා හැකියාවන් සහිත සැබෑ සමානාත්මතාවයෙන් යුත් සේවා ස්ථානයක් නිර්මාණය කළ හැකියි.” යනුවෙනි.
මෙම වැඩසටහන සඳහා සමාජ සේවා දෙපාර්තමේන්තුවේ අධ්‍යක්ෂිකා දර්ශනී කරුණාරත්න මහත්මියගේ සහයෝගයද හිමි වූ අතර ඇය එහිදී රාජ්‍ය හා පෞද්ගලික හවුල්කාරීත්වයේ තීරණාත්මක කාර්යභාරය අවධාරණය කරමින් “ආබාධිත පුද්ගලයින්ගේ සේවා නියුත්කිය ඉහළ නැංවීමට මෙන්ම සමානාත්මතාවයෙන් යුත් රැකියා වෙළෙඳපොලක් නිර්මාණය කිරීමට පුද්ගලික අංශයේ ක්‍රියාකාරී සහභාගීත්වය උපකාරී වනවා” යනුවෙන් පැවසීය.
මෙම වැඩසටහන පිළිබඳව අදහස් දක්වමින් ජාත්‍යන්තර කම්කරු සංවිධනයේ මෙරට අධ්‍යක්ෂ Joni Simpson මහත්මිය සඳහන් කර සිටියේ “ශ්‍රී ලංකාව විසින් අනුමත කරන ලද ආබාධ සහිත පුද්ගලයින්ගේ අයිතිවාසිකම් පිළිබඳ එක්සත් ජාතීන්ගේ සම්මුතිය සමාජයේ සෑම අංශයකම ආබාධ සහිත පුද්ගලයින්ගේ අයිතිවාසිකම් ප්‍රවර්ධනය කරයි. අප සියලු දෙනාගේ සාමූහික ප්‍රයත්නය තුළින් අර්ථවත් වෙනසක් ඇති කිරීමට මෙන්ම ශ්‍රම වෙළෙඳපොල තුළ සැමට සමාන අවස්ථා ලබා දීමට හැකියාව උදා වනවා” යනුවෙනි.
මේ සම්බන්ධයෙන් අදහස් එක් කරමින් ලංකා සේවා යෝජක සම්මේලනයේ අධ්‍යක්ෂ ජනරාල් වජිර ඇල්ලේපොල මහතා ආබාධ සහිත පුද්ගලයින්ගේ හැකියාවන් ප්‍රයෝජනයට ගැනීමේ වැදගත්කම අවධාරණය කළේය. ඒ මහතා සඳහන් කර සිටියේ මෙය සමානාත්මතාවය සඳහා වන පියවරක් පමණක් නොව නවෝත්පාදනය වෙනුවෙන් මෙන්ම විවිධත්වයේ වටිනාකම් පිළිබිඹු කරන ශ්‍රම බලකායක් නිර්මාණය කිරීමේ අවස්ථාවක්ද වනු ඇති බවයි.
ශ්‍රී ලංකාවේ ඇඟලුම් ක්ෂේත්‍රය සඳහා සියල්ලන්ටම සම්බන්ධ වීමේ හැකියාව උදා කර දීම සඳහා Inclusive Threads කටයුතු කරනු ලබයි. ඒ සඳහා දැනුවත් කිරීම, සමානාත්මතාව ඉහළ නැංවීම හා ප්‍රායෝගික පුහුණු වැඩසටහන් පැවැත්වීම තුළින් ආබාධ සහිත පුද්ගලයින් කර්මාන්තයේ වර්ධනය වෙනුවෙන් අර්ථවත් ලෙස දායක කර ගැනීම සඳහා ඔවුන් සවිබල ගැන්වීමට මෙම වැඩසටහන මඟින් කටයුතු කරයි.
ශ්‍රී ලංකාවේ දියුණු ඇඟලුම් ක්ෂේත්‍රය තුළ සමානාත්මතාව හා අවස්ථාවන් තවදුරටත් ඉහළ නැංවීම, ආර්ථික දියුණුව පමණක් නොව සමාජ සංවර්ධනය සඳහාද කර්මාන්තයේ අඛණ්ඩ කැපවීම තහවුරු කරනු ලබයි.
