පාසල් ජූඩෝ ශූරතා මිහිනිට සහ නිමේෂ්ට

නාවලපිටිය ජයතිලක ගෘහස්ථ ක්‍රීඩාංගණයේ දී පසුගියදා පැවති 24 වැනි ශ්‍රී ලංකා පාසල් ජූඩෝ ශූරතාවලියේ බාලක හා බාලිකා අංශයේ ශූරතා මහනුවර කිංග්ස්වුඩ් විදුහලේ නිමේෂ් අබේකෝන් හා මහනුවර උසස් බාලිකා විදුහලේ මිහිනි දසනායක දිනා ගත්හ.
ගම්පොළ ජිනරාජ බාලිකා විද්‍යාලය ප්‍රසාද ලකුණු 23ක් ලබා ගනිමින් සමස්ත බාලිකා ශූරතාව දිනාගත් අතර, මහනුවර උසස් බාලිකා විද්‍යාලය දෙවැනි ස්ථානයට පත්විය. වික්‍රමබාහු ජාතික පාසල බාලක ශූරතාව දිනාගත් අතර, දෙවැනි ස්ථානය නාවලපිටිය අනුරුද්ධ කුමාර ජාතික පාසලට හිමි විය.
ශ්‍රී ලංකා පාසල් ජූඩෝ සංගමය විසින් සංවිධාන කළ මේ තරගය සඳහා දිවයිනේ සෑම ප්‍රදේශයකින්ම පාසල් 80කට අධික සංඛ්‍යාවක් සහභාගි විය.