පාස්පෝට් ගන්න ඔන්ලයින් වෙන් කිරීම් නවතී

පැමිණෙන පිළිවෙළ අනුව විදේශ ගමන් බලපත්‍ර නිකුත් කිරීමේ කටයුතු අද (28) සිට ආරම්භ කෙරෙනවා. ඒ අනුව විදේශ ගමන් බලපත්‍ර ලබාගැනීම සඳහා මෙතෙක් ක්‍රියාත්මක කළ මාර්ගගත ක්‍රමවේදයට දිනයක් සහ වේලාවක් වෙන් කරගැනීමේ ක්‍රමය මින් ඉදිරියට ක්‍රියාත්මක නොවන බවයි මහජන ආරක්ෂක අමාත්‍ය ටිරාන් අලස් සඳහන් කළේ.කෙසේ වෙතත් විදේශ ගමන් බලපත්‍ර ලබාගැනීම සඳහා බත්තරමුල්ලේ පිහිටි ආගමන හා විගමන දෙපාර්තමේන්තුවේ ප්‍රධාන කාර්යාලයට පැමිණි ජනතාව ඊයේත් දැඩි අසීරුතාවකට පත්වුණා. නිවේදනයක් නිකුත් කරමින් ආගමන හා විගමන පාලක ජනරාල්වරයා ඊයේ ප්‍රකාශ කළේ නව ඉලෙක්ට්‍රොනික විදේශ ගමන් බලපත්‍ර හඳුන්වාදීමට රජය විසින් පියවර ගෙන ඇති අතර ඒ සඳහා විදේශීය සමාගමකට දැනටමත් ටෙන්ඩරයක් ප්‍රදානය කර ඇති බවයි. හදිසි අවශ්‍යතා සඳහා පමණක් විදේශ ගමන් බලපත්‍ර ඉල්ලුම් කරන ලෙසයි එහි දැක්වුණේ. හිස් විදේශ ගමන් බලපත්‍ර 50,000 ක පමණ ප්‍රමාණයක් ඔක්තෝම්බර් මස අවසානයේ හෝ ඊට පෙර ලැබීමට නියමිත බවද අදාළ නිවේදනයේ තවදුරටත් සඳහන් වුණා.