තැපැල් ඡන්ද අයදුම් කිරීම අවසන් දිනය අද – මැතිවරණ පැමිණිලි 157ක් දක්වා ඉහළට

මෙවර ජනාධිපතිවරණය සඳහා ඡන්ද දායකයින්ට තැපැල් ඡන්ද අයදුම් කිරීම සඳහා ලබා දී ඇති කාලය අදින් (09) අවසන් වනවා. ජනාධිපතිවරණය පැවැත්වීමේ දිනය සහිත අතිවිශේෂ ගැසට් පත්‍රය ජූලි මස 26 වැනි දින ප්‍රකාශයට පත් කිරීමත් සමග මැතිවරණ කොමිෂන් සභාව තැපැල් ඡන්ද භාවිත කිරීම සම්බන්ධයෙන් දැනුම්වත් කිරීමක් සිදු කළා. ඒ අනුව මැතිවරණ කොමිසම දැනුම්දුන්නේ අගෝස්තු මස 05 වැනි දින දක්වා ඡන්ද දායකයින්ට සිය තැපැල් ඡන්ද සඳහා අයදුම් පත් ඉදිරිපත් කළ හැකි බවයි. ඉන් පසුව අගෝස්තු මස 05 වැනි දින පෙරවරුවේ මැතිවරණ කොමිෂන් සභාව විසින් තැපැල් ඡන්ද සඳහා අයදුම් කිරීමේ දිනය එදින අවසන් නොවන බවත්; එය තවත් දින කිහිපයක් දීර්ඝ කිරීමට තීරණය කර තිබෙන බවත් නිවේදනය කළා. ඒ අනුවයි එම අමතර දින කිහිපය අගෝස්තු මස 09 වැනි දින අද දින තෙක් දීර්ඝ කරනු ලැබුවේ. 2024 ජනාධිපතිවරණයේ තැපැල් ඡන්ද සඳහා මෙතෙක් ඉල්ලුම් කිරීමට නොහැකි වූ අයදුම්කරුවන් අද දිනය අවසන් වීමට පෙර තමන්ට ආසන්නතම මැතිවරණ බල ප්‍රදේශයේ දිස්ත්‍රික් කාර්යාලවලට ගොස් ඉල්ලුම්පත් භාරදෙන ලෙස මැතිවරණ කොමිසම ප්‍රකාශ කළා. මෙතෙක් අයදුම් කිරීමට නොහැකි වූ අයදුම්කරුවන් හට තැපැල් ඡන්ද අයදුම්පත් තැපෑලට යොමු නොකර; අතින් ගොස් භාරදෙන ලෙස ද කොමිසම දන්වා සිටියා. මේ අතර මැතිවරණ නීති උල්ලංඝනය කිරීම සම්බන්ධයෙන් මැතිවරණ කොමිෂන් සභාව වෙත ලැබී ඇති පැමිණිලි ගණන 130 සීමාව ද ඉක්මවා තිබෙනවා. ගත වූ පැය 24ක කාලය තුළ මැතිවරණ නීති උල්ලංඝනය කිරීම් සම්බන්ධයෙන් පැමිණිලි 20ක් ලැබී ඇති බවයි මැතිවරණ කොමිෂන් සභාව නිවේදනයක් නිකුත් කරමින් සඳහන් කළේ. එම පැමිණිලි 20න් 11ක් ම ලැබී ඇත්තේ ජාතික මැතිවරණ පැමිණිලි කළමනාකරණ මධ්‍යස්ථානය වෙත යි. සෙසු පැමිණිලි 09 දිස්ත්‍රික් මැතිවරණ පැමිණිලි කළමනාකරණ මධ්‍යස්ථානය වෙත ලැබී තිබෙනවා. ඒ අනුව මැතිවරණය ප්‍රකාශයට පත් කළ මාසය වන ජූලි මාසයේ 31 වැනි දින සිට ඊයේ (08) දිනයේ පස්වරු 4.30 වන විට මැතිවරණ නීති උල්ලංඝනය කිරීම් සම්බන්ධයෙන් මුළු පැමිණිලි 157ක් වාර්තා වී ඇති බවයි නිවේදනය දැක්වෙන්නේ. එම පැමිණිලි 157 අතර එක් ප්‍රචණ්ඩ ක්‍රි‍යාවක්, මැතිවරණ නීති උල්ලංඝනය කිරීම් 152ක් සහ වෙනත් චෝදනා 02ක් ද ඊට ඇතුළත්.