හෝමාගම දිස්ත්‍රික් සංවර්ධන කමිටුවේ සභාපති අමාත්‍ය බන්දුල ගුණවර්ධන මහතාගේ අනුදැනුමකින් තොරව හෝමාගම ප්‍රදේශයේ රැස්වීමක් සංවිධානය කළ බව කියන හෝමාගම බල මණ්ඩලය හිටපු පළාත් සභා මන්ත්‍රී ජනක වැලිවත්ත මහතාට විරුද්ධව අමාත්‍ය බන්දුල ගුණවර්ධන මහතා විසින් හෝමාගම පොලිසියට පැමිණිල්ලක් ඉදිරිපත් කරනු ලැබීය.
ඒ අනුව හෝමාගම බල මණ්ඩල රැස්වීමක් කැදවා අමාත්‍ය බන්දුල ගුණවර්ධන මහතාට අපහාස වන අන්දමින් එම රැස්වීමේදී කතාවක් කළ බවට පැමිණිල්ලේ සදහන් වේ.
විනය කඩකර කරමින් නීති විරෝධීව බලමණ්ඩල රැස්වීමක් පැවැත්වීම සහ අමාත්‍යවරයාට අපහාස කිරීම යන චෝදනා යටතේ අමාත්‍යවරයා වෙනුවෙන් ඔහුගේ සම්බන්ධීකරණ ලේකම්වරයා විසින් පැමිණිල්ල ඉදිරිපත් කර ඇති බව හෝමාගම පොලිසිය පවසයි.
එම රැස්වීමට පොදු ජන පෙරමුණේ ජාතික සංවිධායක නාමල් රාජපක්ෂ මහතා ද සහභාගි වී ඇති බව දේශපාලන ආරංචි මාර්ග කියයි.
පොලිසියේ උසස් නිලධාරියෙක් පවසා සිටියේ එම පැමිණිල්ල සිවිල් නඩුවක් යටතට ගැනෙන බවය.
පොදුජන පෙරමුණේ ජාතික සංවිධායක නාමල් රාජපක්ෂගෙන් මේ පිළිබදව විමසූ විට ඔහු පැවසුවේ හිටපු පළාත් සභා මන්ත්‍රී ජනක වැලිවත්ත මහතාගේ ආරාධනය පරිදි ඔහුගේ නිවසට පැමිණි බවත් ඒ අනුව එහි තේ පැන් සංග්‍රහයකටද සහභාගීවීමෙන් පසුව පාක්ෂිකයින් රැසක් තමා හමුවීමට පැමිණි බවත්ය.
